Beşbarmaq dağıquşların miqrasiya dəhlizi
Beşbarmaq dağı və ətraf ərazilər Dövlət Tarix-Mədəniyyət və Təbiət Qoruğunun tərkibinə daxil edilib. Burada quşların 90 km uzunluğunda olan miqrasiya dəhlizi Qafqaz dağları ilə Xəzər dənizi arasından keçir və “darboğaz” (beynəlxalq ekspertlər tərəfindən “bottleneck”) olaraq adlandırılır.
Təbii landşaft səbəbi ilə Beşbarmaq quş müşahidəçiləri üçün unudulmaz təcrübə vəd edir. Xüsusən də, yaz və payız aylarında bu ərazidən hər gün 200 000-dən çox quş miqrasiya edir. Hesablanmışdır ki, Beşbarmaqda bir gün içində 100-dən çox quş növünü müşahidə etmək olar – bu, həqiqətən də, unikal fürsətdir! Burada gün ərzində imperator qartalı, çığırğan xallı qartal, qara kərkəs, çöl belibağlısı, çöl sarı, şahin də daxil olmaqla 20-ə yaxın yırtıcı quşla bərabər, adi bəzgək, çöl haçaquyruğu, boz sığırçın, kiçik qarabatdaq, kiçik torağayı və digər bir çox böyük quş dəstələrini də görmək mümkündür. Dəhlizdən minlərlə ördəkkimilər, vağlar və cüllütlər keçir. Sərçəkimilər də burada istirahət edirlər və onların aralarında bəziləri nadir tapıntı kimi qiymətləndirilir. Eyni zamanda, Beşbarmaq dağının zirvəsinə qalxaraq qayalıq fitçisi, qayalıq sərçəsi, qaraboyun çaxraqçıl və bəzən qırmızıqanad dırmanca da rast gəlmək mümkündür.
Əraziyə xas quşlar
Çöl haçaquyruğu (Glareola nordmanni)
İmperator qartalı (Aquila heliaca)
Çöl qartalı (Aquila nipalensis)
Ağqanad torağay (Alauda leucoptera)
Çöl belibağlısı (leyi) (Circus macrourus)
Qarabaş güləyən qağayı (Ichthyaetus ichthyaetus)
Qırmızıqarın dağdaçapan (Anthus rubescens)
Leşcil ağ kərkəs (Neophron percnopterus)
Qara çalağan (Milvus migrans)
Qaragöz qızılquş (Falco subbuteo)
Adi bəzgək (Tetrax tetrax)
Göy qaya qaratoyuğu (Monticola solitarius)
Qaya sərçəsi (Petronia petronia)
Qırmızıqanad dırmanc (Tichodroma muraria)
Ən uyğun dövrlər
Quşların miqrasiya dövrü mart ayından mayın sonuna qədər davam edir və daha çox sayda quş növünü aprelin ortalarından mayın əvvəlinə qədər müşahidə etmək mümkündür. Payızda isə miqrasiya avqustun ortalarından dekabrın ortalarına qədər uzanır. Bu dövrdə ən uyğun vaxt oktyabrın ortalarından noyabrın sonuna qədər hesab olunur.
Gecələmə
Ərazidən cəmi 3 km məsafədə yerləşən “Zarat” hoteli (+994555258707) yaxınlığı, kifayət qədər rahat olması və quş müşahidəçilərini qonaqlama təcrübəsinə görə uyğun hesab olunur. Daha cənubda, Giləzi ərazisində digər yerləşdirmə müəssisələri mövcuddur. Avtomobillə 30 dəqiqəlik məsafədə məşhur “Qalaaltı Hotel & Spa” yerləşir.
