uzunömürlülər diyarıLeriki kəşf edin
Talış dağlarının zirvələrində yerləşən sakit Lerik şəhəri dağlar, çaylar və şəlalələrlə zəngin möhtəşəm təbiət mənzərələri ilə əhatə olunub. Lerikin suyu, havası, bitkiləri o qədər təmiz və canlıdır ki, sakinlər onların sağlamlığa faydalı olduğuna əmindirlər. Elə buna görə də Lerik məhz uzunömürlüləri ilə tanınır. Günümüzdə də Lerikdə yaşayan uzunömürlü insanların sayı kifayət qədər çoxdur. Burada insanlar 100 ildən artıq ömür sürür və onların həyat tərzi, təbiətlə bağlılığı böyük maraq doğurur. Heç də təsadüfi deyildir ki, dünyada yeganə olan Lerik Uzunömürlülər muzeyi bu regionda yaradılmışdır. Müasir memarlıq elementlərindən istifadə edilməklə inşa olunan və 2 salondan ibarət muzeydə yaşı 100-ü keçmiş 50-dən çox lerikli haqqında 2 mindən artıq eksponat, o cümlədən maraqlı məlumatlar, fotoşəkillər yer almışdır. Muzeydə adı çəkilən ən məşhur şəxslərdən biri də 168 il ömür sürmüş Barzavu kənd sakini Şirəli Müslümovdur. Əgər uzun və sağlam ömrün sirlərini öyrənmək istəyirsinizsə, Lerikə səfər etməyi unutmayın.
