Lerikdəmağaraların kəşfi
Hər tərəfdən dağ silsilələri ilə əhatə olunan Lerik rayonu cənub zonasının ən gəzməli-görməli yerlərindən biridir. Məhz Lerikin Zuvand ərazisində, Zuvandçay yatağından 75-100 metr yüksəklikdə yerləşən qədim mağaralar var ki, ziyarətçilərə rayonun tarixindən xəbər verir. Talış dağlarının möhtəşəm Dəlikdaş zirvəsində qərar tutan mağara Buzeyir mağarası adlanır. Buzeyir kəndinin yaxınlığında aşkar edildiyi üçün mağara bu cür adlandırılır və ən qədim yaşayış məskənlərindən biri hesab olunur. Belə ki, mağaradan tapılan maddi nümunələr Paleolit dövrünə aid edilir. Bu və bir-birinə yaxın yerləşən digər mağaralara yalnız piyada qalxmaq mümkündür və bunun üçün xüsusi geyim tələb olunur. Ərazi sıldırım qayalıq olduğundan yerli bələdçiyə müraciət edə bilərsiniz. Maraqlıdır ki, mağaralarda yayın ən qızmar vaxtı belə hərarət 15 dərəcədən yuxarı qalxmır. Həmçinin bu yerlərdə nadir quş növlərinin müşahidəsi üçün əlverişli şərait var. Həmin quşlara ağboğaz bülbül, qısabarmaq sərçə və qırmızıqanad mərcimək quşu aid edilir.
