nəsillərin yadigarıŞəki ipəkçilik diyarı
Şəkidə ipəkçilik sadəcə ipək parça istehsalından ibarət deyil, həm də böyük səbr, məharət və fədakarlıq tələb edən qədim el sənətidir. Yerli sənətkarlar əsrlər boyu nəsildən-nəslə ötürülən ipəkçilik ənənələrini qoruyub saxlayaraq burada ipək istehsalı ilə məşğul olurlar.
Ümumiyyətlə Şəkidə toxuculuq sənəti milli qadın geyiminin zərif atributu olan kəlağayı hazırlanması ilə sıx bağlıdır. Gözoxşayan ornamentlərlə bəzədilən bu baş örtüyü sevgi, gözəllik, sülh və əmin-amanlıq simvoludur. Həmçinin özündə xalq məişətinin bir sıra xüsusiyyətlərini, qədim dəyərlərimizi, və Azərbaycan qadınının dəyanətini təcəssüm etdirir. Kəlağayıların hazırlanması müxtəlif mərhələlərdən keçir və yalnız təmiz ipəkdən kvadrat formada hazırlanır. Kəlağayını adəti üzrə kişilər hazırlayır, ona görə ki, onlar qadınlara olan duyğularını və münasibətlərini nəbati naxışların, rənglərin dili ilə dərindən ifadə edirlər.
Ölkəmizin müxtəlif bölgələrində ipəkçilik istehsalı inkişaf etsə də, ipəkçilikdən söz düşəndə gözlərimizin önünə ilk Şəkinin gəlməsi, əlbəttə ki, təsadüfi deyil. Şəki ipəkçilik adət-ənənələrinin yaşadıldığı, UNESCO-nun Qeyri-Maddi İrs Siyahısına daxil edilmiş kəlağayı sənətinin nəsillərdən-nəsillərə ötürüldüyü qədim ipəkçilik yurdumuzdur. Şəkidə olduğunuz zaman Şəki İpək Kombinatına üz tutsanız, ipək məmulatların istehsal prosesini canlı izləmək, ipəkçiliklə bağlı maraqlı məlumatlar almaq imkanınız olacaq.
Həmçinin mərhum usta Ziya Şamilovun oğlu Əmiraslan Şamilovun M.Ə.Rəsulzadə prospektində yerləşən emalatxanasına da baş çəkin. Burada yaylıqların boyanma və bəzək prosesini müşahidə edərək incəlikləri öyrənə bilərsiniz. Rəngbərəng ipək yaylıqları Şəki İpək Kombinatındakı mağazadan və ya Əmiraslan Şamilova məxsus mağazadan ala bilərsiniz. Mağaza Yuxarı Karvansaraydan bir qədər aşağıda, M. F. Axundzadə küçəsində yerləşir.
Ətraflı məlumat üçün:
Şəki İpək Kombinatı
www.azeripek.com
Tel.: +99455 623 82 95
Əmiraslan Şamilovun kəlağayı emalatxanası
Tel.: +99450 323 90 90
