təbiətin naxışısənətkarlar şəhəri
Lahıca ilk addım atılan andan buranın adi dağ kəndi olmadığını anlamaq mümkündür. İri çay daşlarından salınmış küçələr, yerli memarların tikdiyi məscidlər və binalar, məhəllələrin yerləşməsi burada şəhər mədəniyyəti və sənətkarlığın yaşının çox qədimlərə dayandığından xəbər verir. Lahıc Azərbaycanın “misgərlik paytaxtı” kimi tanınsa da və “Lahıc misgərlik sənəti” YUNESKO-nun Qeyri-maddi mədəni irs üzrə Reprezentativ Siyahısına daxil edilsə də, əslində Lahıcın sənətkarlıq xəritəsi çox genişdir. Qədim sənətkarlıq növlərinin bəziləri unudulsa da, misgərlik, dəmirçilik, xalçaçılıq, bənnalıq, dülgərlik, dabbağlıq, papaqçılıq kimi sahələr bu gün də Lahıcın sənətkarlıq simasını bəzəyir. Özünüzü bir neçə saatlıq orta əsrlər sənətkarlıq şəhərində hiss etmək üçün Lahıca səfər etmək kifayətdir.
Mis əşyaların gözqamaşdıran dünyasına düşmək üçün yolunuzu misgər Nəzər Əliyevin emalatxanasından sala bilərsiniz. Hazırladığı mis nar Vyana şəhərində keçirilən nar festivalında nümayiş olunun Nəzər Əliyev tez-tez turistlər üçün master-klaslar təşkil edir. Səkkiz yaşından dəmirçiliklə məşğul olan Xosrov Abbasovun çalışdığı emalatxana isə 19-cu əsrdən qalma ulu baba yadigarıdır. Burada olarkən dəmirçi kürəsinin nurundan, çəkicin ritmləri xatırladan səsindən ayrılmaq istəməyəcəksiniz. 50 ildir ki, xalça toxuyan Sülhiyyə Əliyevanın dükanında isə özünüzü naxışların sehrli aləmində hiss edəcəksiniz. Burada Sülhiyyə xanımın barmaqlarından çıxan naxışların ilmələrə necə düzüldüyünün canlı şahidi ola bilərsiniz. Dabbağ Muxtar Mahmudov və oğlu papaqçı Rəsul Muxtarov qədim sənətkarlığı yaşadanlardandırlar. Milli rəqslərin ifası zamanı geyilən papaq növləri bu ata-oğulun əl əməyinin məhsuludur. Digər papaqçı Abdulla Dadaşovun dükanında isə növbənöv buxara papaqlara rast gələ bilərsiniz. Lahıcın məşhur sənətkarlarından olan sərrac Ağaməşədi Hüseynov isə bölgədə əsas nəqliyyat vasitəsi olan atlar üçün yüyən, qırmanc, yəhər hazırlayır. Bu sənətkarların master-klaslarında iştirak etmək və Lahıcdan sənətkarlıq suveniri ilə ayrılmaq üçün nəsildən nəslə keçən bu emalatxanalara baş çəkin. Master-klaslarla bağlı ətraflı məlumat üçün “Lahıc” Dövlət Tarix-Mədəniyyət qoruğu ilə əlaqə saxlaya bilərsiniz.
Tel.: +99451 817 2100
