Qalaxudat – Qrız marşrutu üzrə haykinq

Marşrut qismən yorucu olsa da, cığırlar hər yerdə aydın sezilir və tam işarələnib. Bu işarələri izləyərək maşın yolunun kənarı ilə irəliləyin – kəndin çıxacağında sağ tərəfdəki qəbiristanlıqdan 400 m irəlidə Kokoş dərəsinə doğru ayrılan cığıra yön alacaqsınız. Dərəyə sərt enişlə qayalıq relyefdə davam edin. 1,3 km yol qət edib, kiçik çayı keçib dərə içi ilə bir az irəlilədikdən sonra kiçik yoxuşla kanyonun müşahidə nöqtəsinə çatırsınız. Təxminən 2,5 km irəlidə (Qurqur şəlaləsi yaxınlıqdadır) isə daha gursulu çayı keçirsiniz, oradan da 2,8 km sonra Qrız kəndinə çatırsınız.

Ətraf cığırlar

Bu marşrutu Xınalıq – Qalaxudat və Qrız – Qrızdəhnə marşrutları ilə birləşdirmək olar.

Mövsüm

Texniki olaraq orta çətin yürüş olduğu üçün uyğun dağ yürüş geyimlərinizin olması vacibdir. Kokoş dərəsinə eniş sərt olduğu üçün qışda qarlı günlərdə xüsusən ehtiyatlı davranmalısınız. Yaşıl təbiətdən zövq almaq istəsəniz, may – iyul, qarlı dağları görmək üçün isə dekabr – fevral aylarında bu marşrut çox idealdır. Amma səfər öncəsi hava proqnozunu yoxlamaq tövsiyə olunur. Dumanlı, yağışlı və qarlı hava şəraiti yürüşü xeyli çətinləşdirə bilər. Küləkli havada Kokoş dərəsinə eniş risklidir.

May və sentyabr aylarında, qoyun sürülərinin köç vaxtı Kokoş dərəsində müvəqqəti dayanan qoyun sürülərinin yanında çoban itləri ilə qarşılaşa bilərsiniz. Buradan keçərkən ehtiyatlı olun. Yarana biləcək xoşagəlməz halların qarşısını almaq üçün çobanı uzaqdan səsləməyiniz tövsiyə olunur.

Qida və gecələmə

Qalaxudat və Qrız kəndlərində restoran və ya kafe yoxdur. Ancaq kənddə qonaqlara yemək və gecələmə təklif edən qonaq evləri fəaliyyət göstərir. Gecələmək üçün qonaq evləri, hotel və digər yerləşdirmə müəssisələrinin yerini marşrutun xəritəsində tapa bilərsiniz.

Su
Kənddən çıxmamış kəndlilərin həyətlərində bulaqlardan su qablarınızı doldura bilərsiniz. Marşrut boyunca iki yerdə içməli bulaq var. Kokoş dərəsinə enib köndələn torpaq cığırla yürüş edərkən kiçik çayın üzərindən keçirsiniz. Yağışlı və qarın əridiyi dövrlərdən başqa digər vaxtlarda çayın suyu təmiz və içməli olur. Havanın istiliyindən asılı olaraq ən azı 1,5-2 litr su ehtiyatı götürməyiniz məsləhətdir. İkinci içməli su mənbəyi isə Qurqur şəlaləsinin axdığı çayın suyudur. Bu su hövzəsi də yağışlı və qarın əridiyi vaxtlarda bulanıq olur.

Nəqliyyat

Qalaxudat kəndinə yolsuzluq avtomobili ilə getmək mümkündür və Qubanın mərkəzindən yalnız yerli taksilər ilə 50 AZN qarşılığında getmək olar. Həmin gün Qalaxudatdan geri qayıdacaqsınızsa, sürücü sizi gözləyə və Qubaya əlavə ödəniş tələb etmədən qaytara bilər. Yenə həmin gün Qrız kəndinə yürüş edəcəyiniz təqdirdə yürüşün sonunda Qrızdan Qubaya eyni sürücüyə əlavə 30 AZN ödəniş etməklə geri qayıda bilərsiniz.

İcazələr və xüsusi mühafizə edilən ərazilər
Bu marşrutla hərəkət etmək üçün öncədən heç bir icazə almaq tələb edilmir. Cığır heç bir xüsusi mühafizə olunan təbiət ərazisindən və ya sərhəd mühafizə zolağından keçmir.