Qrız – Qalaxudat marşrutu üzrə haykinq

Marşrut qismən yorucu olsa da, cığırlar hər yerdə aydın sezilir və tam işarələnib. Bu işarələri izləyərək irəliləyin – kəndin çıxışından köndələn cığırla 1,6 km gedib kanyonun füsunkar mənzərəsinə şahid olacaqsınız. 1,2 km irəlidə körpünü keçib (Qurqur şəlaləsi yaxınlıqdadır), Kokoş dərəsinə kimi 2,5 km məsafədə kanyonun kənarı ilə davam edirsiniz. Buradan kiçik eniş və dərə içi bir az irəlilədikdən sonra çayı keçib, sonra 1,3 km yoxuş məsafəsi qət edirsiniz. Yolun kənarından Qalaxudat kəndi görünəcək və nişanları izləyərək tezliklə kəndin girişinə çatacaqsınız.

Mövsüm

Qalaxudatadək olan tam marşrut texniki olaraq orta çətin yürüş olduğu üçün uyğun dağ yürüş geyimlərinizin və yürüş təcrübənizin olması vacibdir. Əgər Qurqur şəlaləsinə yürüş edəcəksinizsə, xüsusi geyim (qışda su keçirməyən və isti geyimlər istisna olmaqla) və təcrübə tələb olunmur. Yaşıl təbiətdən zövq almaq istəsəniz, may – iyul, qarlı dağları görmək üçün isə dekabr – fevral aylarında bu marşrut çox idealdır. Amma səfər öncəsi hava proqnozunu yoxlamaq tövsiyə olunur. Dumanlı, yağışlı və qarlı hava şəraiti yürüşü xeyli çətinləşdirə bilər. May və sentyabr aylarında, qoyun sürülərinin köç vaxtı Kokoş dərəsində müvəqqəti dayanan qoyun sürülərinin yanında çoban itləri ilə qarşılaşa bilərsiniz. Buradan keçərkən ehtiyatlı olun. Yarana biləcək xoşagəlməz halların qarşısını almaq üçün çobanı uzaqdan səsləməyiniz tövsiyə olunur.

Ətraf cığırlar

Bu marşrutu Qrızdəhnə – Qrız və Qalaxudat – Xınalıq marşrutları ilə birləşdirə bilərsiniz.

Qida və gecələmə

Qrız və Qalaxudat kəndlərində restoran və ya kafe yoxdur. Ancaq kəndlərdə qonaqlara yemək və gecələmə təklif edən qonaq evləri fəaliyyət göstərir. Gecələmək üçün qonaq evləri, hotel və digər yerləşdirmə müəssisələrinin yerini marşrutun xəritəsində tapa bilərsiniz.

Su
Kənddən çıxmamış kəndlilərin həyətlərində bulaqlardan su qablarınızı doldura bilərsiniz. Marşrut boyunca iki yerdə içməli bulaq var. Havanın istiliyindən asılı olaraq ən azı 1,5-2 litr su ehtiyatı götürməyiniz məsləhətdir. İlk içməli su mənbəyi Qurqur şəlaləsinin axdığı çayın suyudur. Bu su hövzəsi yağışlı və qarın əridiyi vaxtlarda bulanıq olur. İkinci bulaq yürüşün təxminən 7-ci km-də Kokoş dərəsindəki kiçik çayın suyudur. Bu çayın suyu da yağışlı və qarın əridiyi vaxtlarda bulanıq olur.

Nəqliyyat

Qrız kəndinə yolsuzluq avtomobili ilə getmək mümkündür və Qubanın mərkəzindən yalnız yerli taksilər ilə 60 AZN qarşılığında getmək olar. Həmin gün Qrızdan geri qayıdacaqsınızsa, sürücü sizi gözləyə və əlavə ödənişə tələb etmədən Qubaya geri qaytara bilər. Yenə həmin gün Qalaxudat kəndinə yürüş edəcəyiniz təqdirdə yürüşün sonunda Qalaxudatdan Qubaya eyni sürücüyə əlavə 20 AZN ödəniş etməklə geri qayıda bilərsiniz.

İcazələr və xüsusi mühafizə edilən ərazilər
Bu marşrutla hərəkət etmək üçün öncədən heç bir icazə almaq tələb edilmir. Cığır heç bir xüsusi mühafizə olunan təbiət ərazisindən və ya sərhəd mühafizə zolağından keçmir.