Şamaxı boyutarixi marşrut
XII-XIII əsrin əvvəllərində istedadlı memar və sənətkarların yaşayıb-yaratdıqları Şirvanda memarlıq inkişaf edirdi. İpək Yolu üzərində qərarlaşan, xüsusi əhəmiyyət kəsb edən və orta əsrlərdə Şirvanşahlar dövlətinin paytaxtı olmuş Şamaxı şəhəri zəngin tarixi ilə seçilir. Bir zamanlar Şamaxının mühafizəsi üçün tikilmiş, lakin indi ucqar dağlarda təbiət qoynunda uyuyan Narın Qala, Gülüstan və Buğurd qalalarının qalıqlarından başqa, şəhərdə həmin zamanlara aid daha çox tarixi tikili, təəssüf ki, dövrümüzə qədər gəlib çıxmamışdır. Bu yerlərdə gəzintiyə çıxmaq səyahət həvəskarlarına xoş anlar bəxş edəcək. Tarixlə maraqlananlar şəhərin gözəl mənzərəli yaşıl təpələri üzərində yerləşən Yeddi günbəz türbələr kompleksini mütləq ziyarət etməlidirlər. Kompleksdə Şirvan xanlığının (1748-1820) son xanı və onun ailəsinin dəfn olunduğu yeddi məzar yerləşir. Kompleks Şirvan memarlıq məktəbinin xüsusiyyətlərinə sahibdir. Azərbaycanın ən tanınmış şairlərindən biri, satirik şeirləri XX əsrin əvvəllərində “Molla Nəsrəddin” jurnalında çap olunan Mirzə Ələkbər Sabir də burada dəfn edilmişdir.
