balıq fermasındasakit istirahət
Zaqatala rayonunun Maqov kəndində, ağacların əhatəsində yerləşən Zaqatala Forel Əmtəə təsərrüfatı 1979-cu ildən fəaliyyət göstərir. Burada dağ çayları, bulaq və quyu sularından istifadə edilməklə göy qurşağı və qızılı çay foreli yetişdirilir. Təsərrüfatda balıqların yetişdirilməsi bölgənin ekosisteminin, çaylarda balıq ehtiyatının qorunmasına dəstək verir.
Zaqatala Forel Əmtəə təsərrüfatı ekoturizm həvəskarları və ləziz təamlar axtarışında olanları daha çox cəlb edir. Burada olarkən balıqçılıq fermasının, balıq yetişdirməyin görünməyən tərəfləri ilə tanış ola biləcəksiniz. Peşəkar balıqyetişdirənlər sizi balıqların bəslənməsi prosesi ilə tanış edəcəklər və özünüz də bu prosesdə iştirak edə bilərsiniz. Fermanın daxilində fəaliyyət göstərən restoranda isə qızardılmış və ya hisə verilmiş forel balığını nuş edə bilərsiniz.
Burada zövq alacağınız digər bir məşğuliyyət isə balıq tutmaq olacaq. Tutduğunuz balıqları restoranda çalışan aşpazlara verərək sizə dadlı nahar hazırlamalarını istəyə bilərsiniz. Bundan başqa may-sentyabr ayları arasında əvvəlcədən sifariş etməklə balıq hazırlanması master-klaslarında da iştirak edə bilərsiniz. Şəhərin səs-küyündən uzaqlaşıb vaxtınızı sakitlik və ruhi dinclik içində keçirmək istəyirsinizsə, Zaqatala Forel Əmtəə təsərrüfatına üz tutun.
Ətraflı məlumat üçün:
Zaqatala Forel Əmtəə təsərrüfatı
Ünvan: Zaqatala rayonu, Maqov kəndi
Tel.: +99450 461 1178
